• A Axencia
• Actualidade
• FAEPAC en Europa
• Imaxes
• Mapa Web

Auditoría enerxética

O documento de traballo “Estratexia de aforro e eficiencia enerxética en España 2004-2012”, elaborado polo Ministerio de Economía, considera prioritario realizar auditorías enerxéticas nas industrias para alcanzar os obxectivos fixados por este organismo público para o sector.

• colexios

• dependencias municipais

• alumeados públicos

• explotacións agricolas

• factorías da madeira
  

• Matadoiros, etc
  

Auditorías enerxéticas municipais

Coa finalidade de avaliar da forma máis eficaz posible as actuacións a realizar sobre as instalacións de consumo enerxético de cada un dos 4 concellos afectados, incidindo máis significativamente sobre as zonas máis prioritarias destes, unha das actuacións primordiais a executar será a realización de auditorías que valoren o estado actual das instalacións, dende o punto de vista enerxético, e permita ademais establecer os mecanismos de análises precisas que posibiliten unha xestión máis axeitada sobre estas instalacións no futuro. A falta de información clara e precisa sobre o tipo de instalacións de consumo enerxético e o seu rendemento nos concellos obxecto deste estudio, esixe sen demora a realización de estudios e análises detalladas que ofrezan os datos necesarios para poder intervir axeitadamente sobre estas infraestruturas, garantindo a máxima eficacia nas actuacións e optimizando os investimentos realizados por unha clara orde de prioridades segundo a vantaxe das medidas a levar a cabo.

As auditorías enerxéticas permitirán coñecer cáles son os puntos críticos de cada un dos concellos nas súas instalacións de consumo enerxético e inverter primeiramente nos que presenten maiores carencias ou acheguen maiores beneficios. As limitacións presupostarias non permitirán actuar sobre a totalidade de problemas que se detecten pero coñeceranse e reflectiranse as vantaxes que representará inverter en solucionalos.

O plan económico - financeiro e análise de amortización é importante para facer ver aos concellos as melloras conseguidas con este tipo de actuacións. Algún dos puntos a detectar mediante as auditorías serán:

- Substitución en iluminado público de lámpadas de VMcc por VSAP posto que dado o baixo custo que isto leva consigo obtéñense uns importantes aforros tanto directos (enerxía) como indirectos (mantemento). Esta medida é importante posto que a iluminación pública pode chegar a supoñer nun concello o 60% do gasto enerxético.

 - - Substitución das lámpadas de semáforos por lámpadas LED, onde se  consegue un incremento por 100 na vida útil, unha diminución notoria  dos custos indirectos e unha redución do 70% do consumo enerxético.

 - - A auditoría permitirá avaliar disfuncións nas instalacións térmicas e envolventes que provoquen situacións de deficiente control. A actuación sobre este tipo de cuestións é importantísima non soa polo aforro que leva consigo senón tamén pola compoñente de concienciación social que carrexa.

 - É habitual nas auditorías enerxéticas atopar desaxustes na potencia ou  tarifa eléctrica contratada que supoñen uns sobrecostes, e que  tras un minucioso estudio por persoal técnico pode provocar aforros importantes na facturación.

 Polo tanto estas auditorías centraranse fundamentalmente na obtención da seguinte información:

1. Inventario de instalacións sobre Sistemas de Información Xeográfica (SIX) Será imprescindible coñecer as características das instalacións municipais que impliquen consumo enerxético tanto eléctrico como de combustibles. Ademais para valorar a afección destas instalacións no territorio e na poboación distribuída neste, faise necesario coñecer a súa situación.  Os SIX ofrécennos a posibilidade de xuntar nun mesmo sistema a localización xeográfica da información e os datos alfanuméricos temáticos sobre as súas características.

Por outro lado, situar xeograficamente cada un dos problemas detectados permitirá a posibilidade de actuar rapidamente sobre eles.

2. Análise da facturación eléctrica e optimización da contratación:
Os escasos recursos técnicos que posúe a maioría dos concellos obxecto deste proxecto, así como a inercia nos sistemas de contratación dos servizos de enerxía, obrigan a estudar detidamente a facturación de consumo enerxético nos servizos municipais e axustala ás potencias realmente demandadas. Por outro lado a liberalización do mercado de consumo de enerxía eléctrica invita a que os municipios analicen detidamente as novas posibilidades de contratación de forma que consigan as condicións máis axeitadas ás súas necesidades.

Tamén na factura é importante vixiar se existen penalizacións por consumo de enerxía reactiva que suxerirían a instalación de baterías de condensadores.

3. Proposta dos investimentos necesarios:
Unha vez que se dispoña das características das instalacións e se detecten as deficiencias existentes, farase unha priorización das accións a acometer sobre elas, establecendo un conxunto de medidas a afrontar en cada municipio, valorando o seu custo.

4. Valoración dos aforros previstos:
Para xustificar a necesidade dos investimentos propostos, farase unha análise dos aforros enerxéticos, económicos e ambientais que se prevé obter tras a execución das medidas propostas.

5. Cálculo de prazo de retorno - amortización:
En vista aos aforros económicos que se obteñan en cada unha das actuacións calcularase o prazo de retorno no que se amortizará esta inversión, e que por regra xeral neste tipo de infraestruturas é relativamente pequeno.

A realización de estas auditorías será o punto de partida para a execución das medidas de cambio, substitución, mellora ou nova instalación dos equipamentos e infraestruturas que se considere necesario. Así mesmo, o inventario das instalacións de consumo enerxético que existan no municipio será a base de información para a súa posterior xestión sistematizada mediante sistemas informáticos.